“Pagal ho gaya hai kya?”
Yehi sunna padta hai jab kisi ko anxiety hoti hai. Log samajhte hai ke jisko anxiety hai, vo mentally weak hai… ya shayad pagal ho gaya hai. Lekin sach yeh hai – anxiety ka matlab pagal hona bilkul nahi hota. Is blog mein hum isi myth ko todne wale hain – ekdum real-life examples ke sath, bina filter ke, jaise asli life hoti hai.https://www.medicalnewstoday.com/articles/323454#types
Anxiety hoti kya hai?
Anxiety ka matlab sirf ghabrahat nahi hai. Yeh hoti hai negative thought pattern ka result – jo humne saalon tak overthinking karke develop kiya hota hai.
Socho – jab har choti baat pe hum negative sochte hai:
- “Mere sath kuch galat ho jayega…”
- “Kahin heart attack na aa jaye…”
- “Log kya sochenge…”
Yeh soch dimaag mein baar baar repeat hoti hai. Dheere dheere yeh pattern strong ban jata hai, aur uska asar sirf mind pe nahi, body pe bhi aata hai.https://khuljamind.com/anxiety-10/
Anxiety ke physical symptoms kya hote hai?
Jab negative thoughts control se bahar ho jate hai, toh body react karti hai:
- Heartbeat fast ho jati hai
- Chest tight feel hota hai
- Haath-pair kaanpne lagte hai
- Stomach disturb rehta hai
- Neend nahi aati
- Death ka darr lagta hai
- Panic attacks aate hai
Us waqt lagta hai – “Bas, ab toh main mar jaunga.”
Hospital bhaagne ka mann karta hai.
Kisi se baat karne ka mann nahi karta.
Par lagta hai – “main pagal toh nahi ho gaya?”
Panic Attack ke time kya hota hai? (Ek real experience)
Main jab panic attack se guzra tha…
Ek saans mein doctor ko sab bol diya:
“Mujhe heart attack aa raha hai, meri heartbeat bahut fast hai, please mujhe bacha lo!”
ECG, BP sab normal nikla. Doctor bola – “Yeh anxiety hai, heart attack nahi.”
Par us waqt samajhna mushkil tha.
Darr ne dimaag pe kabza kar liya tha.
Main sochne laga – “Log kya sochenge? Kahi main pagal toh nahi?”
Anxiety ke physical symptoms aur real illness mein kya difference hota hai?
Jab anxiety peak par hoti hai:
- BP thoda high aa sakta hai (but wo temporary hota hai)
- Heartbeat 130–160 tak chali jati hai (lekin phir normal bhi ho jati hai)
- Oximeter pe pulse fast dikhegi (lekin koi permanent damage nahi hota)
Jaise hi anxiety kam hoti hai – sab normal.
Yeh sab brain ke signals hote hai. Real heart attack nahi.https://khuljamind.com/anxiety-4/
Ek aur example – Phobia aur Anxiety
Maan lo kisi ko height se darr hai.
Shimla jate waqt woh sochta hai:
“Yaar, agar car phisal gayi toh neeche girke mar jaunga. Koi dhoondhne bhi nahi aayega.”
Phir jab woh mountain road pe jata hai, uski body full alert ho jati hai:
- Heartbeat fast
- Pasina
- Ghabrahat
Jab flat road aata hai, tab jaake sukoon milta hai.
Yeh sab mental health ka hi part hai. Yeh pagalpan nahi.https://www.healthline.com/health/acrophobia-or-fear-of-heights-symptoms-causes-and-treatment
Toh kya Anxiety ka matlab Pagal Hona hota hai?
BILKUL NAHI.
Yeh sab ek myth hai. Logon ka perception galat hai.
Anxiety ek mental health condition hai – jaise BP, sugar ya asthma.
Lekin India mein ab bhi log samajhte hai:
- “Psychiatrist ke paas ja raha hai? Toh pagal hai kya?”
- “Anxiety ki dawai kha raha hai? Pakka nasha karta hoga.”
- “10 baje uthta hai, ghar ke kaam nahi karta, toh anxiety ho gayi.”
Yeh sab soch society ki gadbad understanding hai.
Maine bhi socha tha – kya main pagal ho gaya hoon?
Jab main psychiatrist ke paas gaya, toh laga –
“Yeh toh pagal logo ke doctor hote hai na?”
Jab panic attack aaya, maine haath jod liya tha strangers ke samne.
Log mujhe dekh rahe the jaise main pagal hoon.
Lekin baad mein jab maine:
- YouTube videos dekhi
- Articles padhe
- CBT therapy start ki
- Psychiatrist se proper consult kiya
Toh samjha – anxiety ka dimaag se lena dena hota hai, pagalpan se nahi.
Kya anxiety ki medicines nasha karti hai?
Nahi.
Yeh bhi ek bada myth hai.
Jo medicines di jati hai:
- Woh temporary hoti hai
- Doctor ke proper guidance se hoti hai
- Addiction wali nahi hoti (agar sahi se li jaye)
CBT (Cognitive Behavioural Therapy) + Medicine + Lifestyle change se anxiety control ho sakti hai.https://www.nimh.nih.gov/health/topics/anxiety-disorders
India mein Mental Health ko leke log kya sochte hai?
Koi agar kahe:
“Main psychiatrist ke paas gaya”
Toh log bolte hai:
- “Arey pagal ho gaya kya?”
- “Tablet mat kha, side-effect ho jayega”
- “Doctor ke paas jaane se kya hoga, 2 peg lele tension chali jayegi”
Bhai… 2 peg se anxiety nahi jaati.
Mental health ek real cheez hai.
Ghar pe baith ke overthink karte rehna, aur fir bhi treatment na lena – yeh strong hone ka sign nahi.
Doctor ke paas jaana – yeh strong hone ka sign hai.
Conclusion:
👉 Anxiety ka matlab pagal hona bilkul nahi hota.
👉 Yeh ek medical condition hai – jise proper treatment se thik kiya ja sakta hai.
👉 Therapy, medication, lifestyle change aur mindfulness se anxiety ko haraya ja sakta hai.
👉 India mein mental health ko normalise karna bohot zaroori hai.
Agar aap ya aapka koi close one anxiety se jujh raha hai – toh doctor se consult karna ek brave step hai, weak hone ka nahi.
Pagal hona aur anxiety hona – yeh dono bilkul alag cheezein hai.
Agar aapko yeh blog samajh aaya, toh please isse share karein – taaki hum milke mental health ke myths ko tod sakein.
Khuljamind – kyunki baat karna zaroori hai.https://khuljamind.com/anxiety-8/