(Ek real zindagi ka anubhav jo har anxious insan ko zarur padna chahiye)
Anxiety ke liye medicine lena zaruri hai ya nahi?
Iska jawab simple “Haan” ya “Nahi” nahi ho sakta.
Kyunki jab aap anxiety jaise mental health issue se guzar rahe hote ho, toh aapko khud samaj nahi aata ke aapke saath kya ho raha hai. Aap bas confuse, ghabraaye hue, aur lost feel karte ho.
Haath kaanpte hai, heart beat itni fast hoti hai jaise abhi kuch ho jayega, akele jaane ka darr – ki agar kuch ho gaya toh hospital kaun le jaayega? Kisi se baat karne ka mann nahi karta, sirf akela rehne ka mann karta hai.
Aapko lagta hai log aapke baare mein peeche baith kar baatein kar rahe hain, aapko galiya de rahe hain, ya aapka mazak uda rahe hain – chahe asli mein koi bhi na ho. Aapka confidence zero ho jata hai.
Aur agar dimaag mein yeh baith gaya ki mujhe heart attack aayega, toh bus – wahi thought baar baar repeat hota hai.
Chahe aap bed pe lete ho, chahe bike chala rahe ho, chahe height dekh rahe ho – har jagah ek hi darr: “kahin mujhe heart attack na aa jaaye.”https://khuljamind.com/heart/
Meri Personal Kahani – Jab Main Vaishno Devi Mein Panic Attack Se Wapas Aa Gaya
Main Vaishno Devi Mandir gaya tha. Jab chadhai aayi, meri saans phool gayi, heart beat itni badh gayi ki laga abhi heart attack aajayega. Maine matha nahi teka. Main seedha wapas aa gaya.
Family ne bola ghoda kar le, helicopter se chadh ja – par main kisi ki sun nahi paya. Sirf ek hi thought – “ghar le chalo, hospital le jao, mujhe kuch ho gaya toh?”
Jab ghar pohcha tab thoda chain mila. Lekin aaj bhi pachtava hota hai ki bina matha teeke wapas aa gaya.https://www.medicalnewstoday.com/articles/323454
Jab Test Reports Normal Aaye Par Ghabrahat Kam Na Hui
Main doctor ke paas gaya, har test – heart, blood, vitamin, calcium – sab kuch normal. Toh phir ye sab kyun ho raha tha? Jab reports normal aaye, tab samaj aaya ki problem anxiety aur overthinking ki wajah se hai.
Tab doctor ne proper diagnosis ke baad medicine start ki.
“Busy Raho, Sab Thik Ho Jayega” Wale Gyaan Ki Reality
Log bolte hain busy raho, doston ke saath raho – sab theek ho jayega.
Lekin reality ye hai ki jab aap anxiety mein hote ho, toh aap logon ke beech hote hue bhi akele feel karte ho. Aapke thoughts aapke dimaag mein ek storm ki tarah ghoomte rehte hain.
Aap kaam karne jaate ho – lekin dimaag nahi lagta. Padhaai mein mann nahi lagta. Job mein seniors kuch samjha rahe hote hain – par samaj nahi aata. Baar-baar poochne pe log bolte hain: “tumhe ek baar mein samajh nahi aata?”
Woh baat dil pe lagti hai. Aap andar se toot jaate ho.
Raat Bhar Neend Nahi Aati – Aur Subah Der Se Uthne Pe Gharwale Daante Hai
Log bolte hain – “yeh ladka 10 baje uthta hai, koi time hi nahi hai!”
Lekin unhe kya pata, poori raat darr ke saath guzri hai.
“Agar left side so gaya toh silent heart attack na aa jaaye…”
“Agar raat mein kuch ho gaya toh kaun le jaayega hospital?”
“Mummy toh roti bana rahi hoti hai, unhe kaise pata chalega mujhe kya hua?”
Yeh soch-soch kar raat bhar neend nahi aati. Subah der se uthte hain – fir daant padti hai. Lekin aap kis ko samjhaaye?
Toh Kya Medicine Lena Zaruri Hai?
Mera jawab hai – Haan. Starting mein bilkul zaruri hai.
Kyunki medicine ek support system banata hai. Ek foundation.
Anxiety ki medicines ka course hota hai – 6 mahine, 9 mahine, kabhi 1–2 saal. Doctor ki guidance mein agar aap medicine lete ho toh koi dangerous side effect nahi hota.
Maine jab first time raat ko ek tablet li thi, toh next day mujhe laga “Yaar, main toh theek ho gaya!”
Dosto ke saath masti, time pe sona, time pe uthna – sab normal lagne laga.
Lekin fir socha: Doctor toh paise kama raha hai, mujhe ab medicine ki zarurat nahi hai.
Aur maine 3 mahine ke baad medicine chhod di.
Result?
Anxiety 2x speed se wapas aayi.https://www.webmd.com/anxiety-panic/what-are-anxiolytics
Jab Mere Papa Ko Heart Attack Aaya
Mere papa ko heart attack aaya. Main unhe PGI hospital le gaya. ICU mein ventilator pe log the, log mar rahe the.
Mujhe laga – “Main yeh sab dekh nahi sakta.”
Main hospital se bhaag gaya.
2 litre pani pee gaya.
Saans itni tej ho gayi – panic attack, anxiety attack – dono saath aagaye.
Ek dost se phone pe 1 ghanta baat ki tab jaake shanti mili.https://khuljamind.com/heart-attack/
Medicine + Therapy + Patience = Best Recovery
Baad mein maine fir se medication start ki. Lekin iss baar doctor ke saath regular consultation ki. Jab mujhe side effect lage – jaise dimag slow, thakaan, irritation – toh doctor ne dose kam ki.
Saath mein maine meditation, mindfulness, walk, affirmations sab try kiya.
Aaj main bilkul 100% thik nahi hoon, lekin main aware hoon. Main cope karna seekh gaya hoon.
Conclusion – Kya Medicine Lena Jaruri Hai?
YES. Jab zarurat ho tab bilkul lena chahiye.
Lekin saath mein doctor ka proper guidance lena zaruri hai.
Medicine lene mein sharm nahi, samajh hoti hai.
Apne liye madad lena weakness nahi, courage hota hai.
Agar aap ya aapka koi close friend anxiety se guzar raha hai, toh usse judge na karein. Uska saath dein.
Kyunki anxiety ka dard wohi samajh sakta hai jise raat bhar neend na aaye, aur subah gharwale keh dein – “tu toh sirf drama kar raha hai.”https://khuljamind.com/anxiety-9/
Agar aapko yeh blog relate hua ho, ya kisi ki help kar sakta ho – toh please share karein.
Apna khulke express karne ke liye Khuljamind ke saath judein.https://www.rxlist.com/anti-anxiety_drugs_anxiolytics/drugs-condition.htm