Ek real life experience jo anxiety aur heart health ke confusion ko samjhata hai
Jab Tak Sab Normal Tha – Anxiety ke pehle ke din
Mujhe anxiety aur panic attacks ka issue 2–3 saal se tha. Kabhi kabhi achanak se ghabrahat, heart beat fast hona, aur saans lene mein dikkat hoti thi. Har baar jab main hospital jaata, doctors mera ECG aur BP check karte, aur sab normal aata. Usse mujhe sukoon milta ki haan, yeh sab anxiety ke symptoms hain – mera dil theek hai.
Injection lagta, body relax hoti, neend aa jaati, aur main ghar aa jaata. Phir psychiatrist ke paas jaake maine dawaiyaan lena start ki, jiske baad anxiety itni control mein aa gayi ki lagta tha jaise anxiety kabhi thi hi nahi.https://khuljamind.com/anxiety-8/
Sidharth Shukla Ki Death – Trigger ka moment
Lekin phir Sidharth Shukla ki sudden death ki news aayi. Har jagah ek hi baat chal rahi thi – “heavy workout se heart attack”. Main bhi gym karta tha, aur uss news ne mera mindset completely badal diya. Sochne laga, “Sidharth jaise celebrity ke saath ho sakta hai, toh mere saath bhi?”
Gym mein jab kisi ne bola, “Kya chakkar hai itne light weight maar raha hai?” toh maine bas jhooti baat bol di – “cutting chal rahi hai.” Par asli reason tha dar. Har rep ke saath bas ek hi darr – kahin heart pe pressure na pad jaaye.https://www.indiatoday.in/television/celebrity/story/what-happened-to-sidharth-shukla-the-night-before-his-death-1848458-2021-09-02
Gym Panic Attack – Jab symptoms real lage
Ek din back workout kar raha tha. Last set mein single arm dumbbell maar raha tha – achanak se heart beat uncontrollably fast ho gayi. Saans ruk si gayi, aur main gym se bhaag kar bahar chala gaya.
Socha fresh hawa loonga toh theek ho jaaunga, par nahi. Doston ko bola, “Hospital chalo, mujhe kuch ho raha hai.” Unhone pehle park le jaane ki koshish ki, par jab dekha ki meri halat bigad rahi hai, toh ghar le gaye.https://khuljamind.com/panic-attack-kya-hota-hai-symptoms-aur-treatment-ek-real-kahani/
Extreme Fear – Death ka darr
Ghar aate hi mummy ne kaha – “Limca pee le, gas hogi”, par mujhe andar se lag raha tha abhi heart attack aayega. Main chillane laga – “Mujhe hospital le chalo, main marr jaaunga!”
Friend car leke aaya. Main peeche leta tha, haath paer kaanp rahe the. Doston ke nakhun pakad liye – darr itna zyada tha. Bas baar-baar keh raha tha, “Bacha lo yaar, aaj nahi toh main marr jaaunga.”
Jab Doctor Ne Bola – “ECG Kharab Hai”
Hospital pahuch ke turant ECG karwaya. Technician bola – “Relax ho jao warna ECG kharab aayega.” Main kisi tarah leta, aur jab report mili – doctor ne bola “ECG thoda galat aaya hai, aapko bade hospital mein admit karna padega.”
Yeh sunte hi meri halat aur kharab ho gayi. “Toh kya sach mein heart problem hai?” Mujhe lagta tha yeh anxiety hi hai, jaise pehle hoti thi. Par ab toh ECG bhi kharab aayi thi – jismein har baar relief milta tha, wo bhi fail ho gaya tha.
Jab Lagaa Ab Toh Main Gaya
Ambulance ka wait kiya bina doston ne bola, “Car se le chalte hai badi hospital.” Peeche baith ke bas main chup tha – mann mein sirf ek thought – “Jeena jitna tha jee liya, ab bas khatam.”
Sochne laga mummy-papa ne itne pyaar se paala, padhaaya… ab unki seva bhi nahi kar paaya. Aankhon se aansu nikal aaye. Dosto ne bola sab theek ho jayega, par main toh andar se hil chuka tha.
Sacchai Samajh Aayi – Anxiety ya Heart Issue?
Hospital pahunch ke naye doctor ne pehle poocha – “Kya symptoms the?” Maine sab bataya. Unhone ECG dekha, fir bola – “ECG bilkul theek hai, pehle waale doctor ne galat samjha.”
Jaise hi yeh suna, meri jaan mein jaan aayi. Maine fir bhi bola – “Ek baar fir se ECG karwa leta hoon sir, taaki mera doubt clear ho jaye.”
ECG repeat karwaya – sab bilkul normal. Doctor ne samjhaya:
“Aapko anxiety trigger hua hai. Panic attack ke time heart beat fast ho jaati hai, saans phoolti hai – isiliye laga ke heart attack aaya. But this is not heart disease – it’s anxiety.”https://www.heart.org/en/health-topics/consumer-healthcare/what-is-cardiovascular-disease/anxiety-and-heart-disease
Darr Khatam Nahi Hota – Health Anxiety ka loop
Doctor ne dawaiyaan di aur bola – “OPD mein next day check kara lena.” Ghar aake sabko bataya ke sab normal hai. Par mere dimag ne ek cheez pakad li – “Toh pehle doctor ne kyun bola ECG kharab hai? Kya wo sach bol raha tha?”
Yeh health anxiety ka hi symptom hai – ek baat dimag mein ghus jaaye toh baar-baar repeat hoti hai.
Agle din main PGI chala gaya, ek aur heart specialist ke paas – sirf is confirmation ke liye ke “mera dil theek hai.”
Conclusion: Anxiety Aur Heart Attack – Fark Samajhna Zaroori Hai
- Anxiety attacks mein heart beat fast hoti hai, saans rukti hai, chest tightness hoti hai.
- Heart attacks mein pain left arm mein jaata hai, pasina chhootta hai, aur ECG/blood tests abnormal aate hain.
- Har baar fast heart beat ka matlab heart disease nahi hota.
- Anxiety ke symptoms real hote hain, lekin unka treatment alag hota hai.
Final Words:
Agar aap bhi kabhi aise phase se guzre ho jahan aapko laga ho ke “ab toh bas khatam”, toh yaad rakho – yeh anxiety ka illusion hota hai. Dar ka matlab yeh nahi ke aap kamzor ho, iska matlab hai aap human ho.
Apne symptoms ko lightly mat lo, lekin overthink bhi mat karo. Diagnosis trusted doctor se karao, aur agar needed ho toh therapy ya medication ka support lo.
Agar yeh blog aapke dil ko chhoo gaya ho, ya aapko apni kahani yaad dila di ho, toh comment karke zaroor batana. Shayad kisi aur ko aapke words se healing mil jaaye.