Anxiety hume tab feel hoti hai jab koi aisi situation hamare saamne aa jati hai jisme humare mann mein darr baith jata hai. Aur agar humare mind mein negative thought patterns pehle se strong hain, toh woh aur zyada trigger ho jaate hain.
Jaise kisi insaan ko heart attack ka darr lagta hai, aur agar usne koi news sun li ke kisi ki heart attack se death ho gayi, toh bas ussi time uska anxiety trigger ho jaata hai. Usse lagta hai ke “mujhe bhi heart attack aa raha hai”, ghabrahat hone lagti hai, heartbeat fast ho jaati hai, saans lene mein dikkat hone lagti hai, left hand mein pain shuru ho jaata hai…
Kyuki usne apne mind ko itni baar yeh bataya hota hai ke heart attack mein aise symptoms hote hain, toh uske negative thought patterns usse woh real physical symptoms feel karwa dete hain.
Phir usse lagta hai:
“Bas, mujhe heart attack aa gaya hai…
Mere left hand mein dard ho raha hai…
Chest pain ho raha hai…
Saans nahi aa rahi…
Heart beat fast ho gayi hai…
Yeh sab toh heart attack ke symptoms hain…
Main marr jaunga…
Hospital le chalo!”
Jab woh hospital jaata hai aur sab test karwata hai, reports aane ke baad bhi usse sukoon nahi milta. Report normal hone ke baad bhi uska mind usmein kuch na kuch negative dhundh leta hai.
Agar kuch thoda sa bhi upar neeche mile, toh bas anxiety dubara trigger ho jaati hai.
Overthinking start ho jaati hai:
“Agar main marr gaya toh?
Abhi toh shaadi bhi nahi hui…
Abhi toh duniya dekhi bhi nahi…
Meri mummy ka kya hoga?
Mere baad unka khayal kaun rakhega?”
Ek ke baad ek negative thoughts aate hain.
Aur isi tarah hum anxiety ke physical aur emotional symptoms feel karne lagte hain.
Jab mujhe pehli baar anxiety attack aaya
Mujhe laga tha ke aaj main mar jaunga.
Main gym jaata tha daily, heavy workout karta tha. Kaafi dinon se overthinking kar raha tha – “gym mein aajkal logon ko heart attack kyu aa raha hai?” Koi treadmill pe, koi deadlift karte time, har jagah death ki news.
News channels aur YouTube mein sirf negative propaganda – protein fake hai, steroids overdose hai, gym mein heart fail ho raha hai…
Ek din main gym mein single-arm rowing kar raha tha – thoda heavy dumbbell tha. Jaise hi main hata, saans lene mein dikkat hone lagi, pasina aa gaya.
Mann mein turant aaya: “Mujhe heart attack aa raha hai.”
Main turant gym ke basement ke bahar bhaag gaya.
Soche laga – thodi der fresh air mein saans lunga toh thik ho jaayega.
Par heart beat aur tez ho gayi.
Main doston ke paas gaya:
“Yaar mujhe kuch ho raha hai, hospital le chalo. Saans nahi aa rahi, heart beat fast hai, haath-pair kaanp rahe hain.”
Wo mujhe bike par ghumane le gaye, bola “shant ho ja”.
Par mera dimaag shant hi nahi ho raha tha.
Main bola:
“Mujhe ghar le chalo.”
Ghar aaya, mummy ko bola:
“Mujhe heart attack lag raha hai.”
Mummy boli:
“Gas bani hogi, limca le aati hoon.”
Limca pee, aur ghabrahat 10x badh gayi.
“Bas ab toh main mar jaunga.”
Phir doston ne mujhe car mein daala.
Hospital 5-10 minute ka raasta lag raha tha jaise pura ek ghanta ho.
Main peechhe baitha ro raha tha – “bhai bacha le aaj, main nahi bach paunga.”
Hospital pahunchte hi main seedha doctor ke paas bhaaga:
“Mujhe heart attack lag raha hai, bacha lo.”
Doctor ne BP check kiya – normal.
Phir ECG karwayi – technician bola:
“Haath-pair kaanp rahe hain, ECG galat aa jaayegi.”
ECG hui – thodi si abnormal aayi.
Doctor ne refer kar diya bade hospital ke liye.
Wahi pe main ro pada – “main mar jaunga.”
Dost bol rahe ambulance bula le, par doctor bola car se le jao.
Car mein baitha, aur ekdum se anxiety ka level down hone laga.
Flashback aane lage – bachpan ke yaad, mummy ka pyar, school ke din…
Aur main bas peeche car mein ro raha tha.
Main bola:
“Meri mummy ko bula lo hospital mein.”
Dost bole:
“Pehle check karwa lete hain, agar admit hua toh bol denge aunty ko.”
Hospital pahunche, doctor ne purani ECG dekhi – bola:
“Yeh toh bilkul normal hai. Kya keh raha tha jo refer karke bheja?”
Maine kaha:
“Usne bola thodi si kharaab hai.”
Doctor bola:
“Nahi bhai, sab normal hai.”
Uske baad toh mujhe saans aayi.
“Sir ek baar aur karwa lo ECG…”
Phir se karwai – normal!
Doctor bola:
“Tu tension le raha hai, sab normal hai – tu bilkul theek hai.”
Tab jaake sukoon mila.https://www.khuljamind.com/mere-anxiety-ki-kahaani/
Anxiety ke physical symptomos
1. Heartbeat Tez Hona
Jab hum koi aisi negative news sunte hain – jaise kisi ka sudden heart attack ya paralysis – toh sabse pehle humari heart beat ekdum se badhne lagti hai. Aisa lagta hai jaise abhi kuch ho jaayega. Aksar lagta hai ke jise humne suna, wahi hamare saath bhi ho raha hai. Jaise kisi ko BP ke wajah se paralysis hua, toh apne mind mein turant ye darr ban jata hai ke “yaar mujhe bhi gussa aata hai, mera bhi BP high rehta hai… kahi mujhe bhi na ho jaaye.” Yeh darr sirf soch nahi rehta, woh physically feel hone lagta hai – tez heartbeat, ghabrahat, aur lagta hai jaise body control se bahar ho rahi hai.
2. Saans Na Aana / Chest Tightness
Anxiety attack aata hai toh saans kheech kheech ke leni padti hai. Chest heavy feel hoti hai. Aisa lagta hai jaise kuch pakad lo, tabhi saans aaye. Agar aap kisi hospital visit ke dauraan ventilator pe kisi ko dekh lein, toh turant mind yeh banata hai ki “kahi mujhe bhi toh heart attack nahi aa raha?” Saans lene mein dikkat, chest tightness, aur panic – sab ek cycle ban jate hain. Lekin agar aapne proper test karwa liye hain aur sab normal hai, toh ye sirf aapke dimaag ka pattern hai. Mind ko baar-baar yeh yaad dilana hoga: “Mere reports theek hain. Mujhe kuch nahi ho raha.”
3. Sweating aur Haath-Pair Kaapna
Anxiety jab zyada barti hai, toh sirf mind nahi, body bhi react karti hai. Haath-pair kaapne lagte hain, pasina aata hai, aankhon ke saamne sab kuch fade hone lagta hai. Negative thought pattern agar kisi past incident se strong bana hai – jaise kisi ke sudden BP badhne se death ho gayi – toh mind ussi direction mein chala jata hai. Har baar jab aisa kuch yaad aata hai, body usi tarah react karti hai. But sach yeh hai: yeh sirf negative thought pattern ka result hai. Aap abhi bilkul safe hain.
4. Thakan (Fatigue)
Anxiety ke chalte insaan mentally hi nahi, physically bhi exhaust ho jata hai. Cricket kheloge, thoda enjoy karoge, lekin next day body thaki-thaki lagegi. Mind baar-baar kahin aur bhaagega – “kahi kuch ho toh nahi gaya?” Raat ki neend bhi puri nahi hoti, aur din bhar energy drained feel hoti hai. Kyunki mind 24/7 overthinking kar raha hota hai, aur woh energy body se consume ho rahi hoti hai – issliye fatigue real hota hai.
5. Pet Ki Problems (Gas, Acidity, Bathroom Jaana)
Anxiety ka digestive system pe direct impact padta hai. Pet kharab rehna, gas, acidity, baar baar bathroom jaana – sab usi ka hissa hai. Kabhi kuch khaaya bhi nahi hota, fir bhi pet kharab lagta hai. Jab weight loss hone lagta hai, toh aur zyada darr badhta hai. Log bolte hain: “Tension mat liya kar”, lekin wo kehna hi anxiety ko aur trigger kar deta hai. Lekin samajhne ki baat ye hai: Pet aur mind ka connection strong hai. Jab anxiety control hoti hai, toh pet ki problems bhi automatically thik hone lagti hain.
Anxiety ke emotional sign
1. Overthinking
Anxiety ka shuruat overthinking se hoti hai. Overthinking sabhi karte hain, lekin kuch samay tak. Agar yeh overthinking continuous ho jaye, poore din, poore hafton, aur poore mahine tak, toh humara mind negative thoughts se bhar jata hai. Hum apne mind ko har waqt negative thoughts bhejte rehte hain, aur yeh negative thoughts anxiety ke roop mein badal jate hain.https://www.khuljamind.com/overthinking-kya-hai-meri-kahani-jo-har-overthinker-ko-padni-chahiye/
Mujhe yaad hai, jab meri family ne ek trip plan kiya tha Leh-Ladakh, toh mere dimaag mein sirf ek hi baat chal rahi thi: “Yeh height par agar car phir neeche gir gayi toh?” Main overthink karne laga tha aur sochta tha ki humari car phad mein gir sakti hai, ya oxygen ki kami ho sakti hai, aur agar mujhe oxygen ki problem ho gayi toh kya hoga? Yeh sab dimaag mein chal raha tha.
Isi tarah, main overthinking karte hue poore trip ko darr ke saath imagine kar raha tha. Hum enjoy nahi kar pa rahe the, sirf darr ke saath soch rahe the ki agar kuch ho gaya toh? Yeh sab humare mind ke negative patterns ki wajah se hota hai.
Lekin jab hum apne mind ko positive thoughts dene lagte hain, toh humare dimaag mein positive patterns develop hote hain. Agar humne apna mind positive thoughts se bhar diya ho, toh koi bhi stressful situation aaye, hum apne mind ko positive soch dikhayenge. Overthinking ek bahut bada emotional sign hai, aur anxiety ka shuruat hamesha humare overthinking se hota hai.https://www.healthline.com/health/how-to-stop-overthinking
2. Fear of Death
Marne ka darr anxiety start he marne ke darr se hoti hai. Yeh darr kisi bhi form mein ho sakta hai—chahe wo heart attack ho, cancer, kidney problems, accident ya koi aur. Jaise maine suna tha ki highway par bohot accidents hote hain aur log maare jaate hain. Ek baar maine suna ki ek family, jisme chaar log the, ek truck se takra gayi thi aur sab maare gaye. Us family ke paas bohot paisa tha, lekin wo paisa ab kis kaam ka? Koi bhi unka istemal karne wala nahi tha. Aise incidents sunke humare dimaag mein yeh darr basa jata hai, aur jab aap apni family ke saath bahar jaate ho, to yeh darr aapko chhupke chhupke follow karta hai: “Kya kuch ho na jaye?” Highway par vehicles bohot tez chalti hain, aur agar humare saath koi accident ho gaya, to hum sab mar jaayenge. Mera pura parivar khatam ho jayega.
Lekin aapko yeh nahi sochna chahiye. Aapko yeh samajhna hoga ki duniya jiti hai, sabko apni family ke saath rehna hai, aur agar kisi bhi cheez ka darr hai, to wo har jagah ho sakta hai. Aapko apne dimaag ko positive soch dene ki koshish karni hogi, jisse negative thoughts kam ho. Agar hum apne mind ko positive rakhte hain, to hum kabhi bhi kisi situation ka samna karte waqt positive hi sochenge.
3. Anger
Anxiety ke waqt gussa aana ek normal baat hai. Jab koi aapko kuch keh de, to aap uss waqt gussa ho jaate ho. Jaise agar aap office mein hain aur aapke manager ya senior ne aapko kuch bola ho, to aapko lagta hai, “Yeh kis hak se mujhe bol raha hai?” Aap sochte hain, “Main toh kaam kar raha hoon, lekin mujhse kuch aur kaam maang raha hai. Yeh insaan samajhta kya hai?” Isse aapka gussa aur anxiety badhne lagti hai. Aap yeh sochne lagte hain, “Agar yeh mujhe yeh sab na bolta, to sab kuch theek rehta.”
Lekin, agar hum apne gusse ko thanda karne ki koshish karein, aur sochne lag jayein ki ho sakta hai ki senior ka apna perspective ho, to hum apne reaction ko better handle kar sakte hain. Thoda thanda paani pee kar, kuch der aaram se baith kar, aap apne gusse ko control kar sakte hain. Isse na sirf aapka gussa kam hoga, balki aap zyada productive ho sakte hain.
4. Insomnia (Neend na Aana)
Neend na aana anxiety ka ek bohot bada emotional sign hai. Jab hum overthinking kar rahe hote hain, to humare dimaag mein kayi tarah ke thoughts hote hain. Jaise, “Kya mujhe silent heart attack ho jayega?” Aapne YouTube par dekha hoga ki left side pe soona accha hota hai, lekin aapko yeh dar lagta hai ki left side pe soote waqt dil dab jaayega, aur aapko heart attack aa jaayega. Yeh sab soch kar hum apni raat ki neend khatam kar lete hain. Humein yeh nahi pata hota ki hamare dil mein koi problem nahi hai, hum sirf apni overthinking se apne aap ko mentally disturb kar lete hain.
Aise waqt mein humein apne mind ko positive thoughts dene chahiye. Agar hum positive cheezein dekhein, jaise YouTube par inspiring videos ya achi books padhte hain, to humara dimaag bhi positive rahega aur humari neend bhi improve hogi. Positive logo ke saath waqt guzaarna aur positive cheezon par focus karna humari anxiety ko kam kar sakta hai.
5. Lack of Confidence
Anxiety ke dauran aapka confidence bhi kaafi down ho jata hai. Jab aap kisi se baat karna chahte ho, to aapko lagta hai ki woh aapko judge karenge. Aapko yeh sochne lagta hai, “Kya mujhe pagal samjhenge?” Ya “Kya wo mera mazak udayenge?” Is wajah se aap dheere dheere akele rehne lagte ho. Office mein bhi aapka dil nahi lagta, aur ghar mein bhi aap apne aap ko sabse door rakhna chahte ho. Aapko lagta hai, “Mujhe bas apne kaam se kaam rakhna hai, koi disturb na kare.”
Lekin agar aap yeh sochne lagte hain ki, “Agar mujhe kis se baat karni hai, to main baat karunga,” to aapka confidence dheere dheere improve ho sakta hai. Aapko apne thoughts ko positive direction dene ki zarurat hai. Agar koi aapke baare mein kuch keh raha hai, to aapko yeh sochna hoga ki aapko unki baaton se farq nahi padna chahiye. Aapko apne confidence ko boost karna hoga, taki aap apne goals ko achieve kar sakein.https://psychcentral.com/anxiety/anxiety-and-low-self-esteem
End Note
Anxiety ko kabhi bhi ignore na karein, kyunki yeh aapko mentally, physically aur emotionally hurt kar sakti hai. Agar aapko lagta hai ki aapko anxiety ho rahi hai, to sharmayiye mat, kisi specialist ke paas jaayein aur apne check-up karwayein. Anxiety ek treatable bimari hai, jise thodi medicines, exercise aur daily routine ke changes se control kiya jaa sakta hai.
Bas yeh yaad rakhein, aap kisi bhi situation mein apne aap ko harane na dein. Aap apne life ke real fighter ho, aur aap apne aap ko kabhi nahi harne doge.https://www.verywellmind.com/emotional-symptoms-of-anxiety-2584112
Agar aapko yeh blog pasand aaye, to please like, share aur comment@khuljamind
1 thought on “Anxiety kaise feel hoti hai? Physical aur Emotional Signs”