Anxiety ki wajah se kabhi kabhi hum har choti choti baat par gussa karne lagte hain. Aisa hota hai ki hum illogical baaton se ladne lagte hain, jinka sach se koi lena dena nahi hota, phir bhi hum un baaton ko lekar khud pareshan ho jaate hain. Kabhi lagta hai ki sab log sirf aapke baare mein baat kar rahe hain, kabhi lagta hai ki aap pagal ho rahe ho, aur kabhi lagta hai ki aapko koi health issue hai.
Sexual thoughts bhi din raat aapke dimaag mein chalte rehte hain. Aur doston par bhi aapko gussa aata rehta hai, aisa lagta hai ki woh aapke baare mein ulta seedha baatein karte hain. Ek example leta hoon: kabhi aapko lagta hai ki sab aapke baare mein baat kar rahe hain. Aap ghar se bahar nikalte hain, aur lagta hai ki sab aapke baare mein hi baat kar rahe hain. Agar aap bike chala rahe hain, toh aapko gussa aata hai ki itni aukaat in logon ki ke woh aapke baare mein baat kar rahe hain.
Kabhi aap itne gusse mein aate ho ki sochte ho, “Inke do thappad pad jaayein toh achha hai.” Lekin phir thodi der baad sochte ho, “Yaar, mere baare mein kyun baat karein? Main toh unse baat bhi nahi karta.” Aur phir aapka mood ekdum se swing kar jata hai.
Agar aap office ja rahe ho, toh wahan bhi aise hi scene banta hai. Agar koi hasta hai, toh aapko lagta hai ki woh aapke upar hi hassa hai. Matlab aap jaan ke uske paas jakar baithte ho, aur sochte ho ki haan, yehi baat kar raha hai mere baare mein. Agar aapka dimaag aise chal raha hai, toh aapka poora din kharab rahega. Aapka dhyaan office mein nahi rahega, bas us bande par hi rahega jise aap samajhte ho ki woh aapke baare mein kuch bol raha hai.
Iska solution ye nahi hai ki aap us bande se ladho, ya hamesha us baat ko lekar pareshaan raho. Agar koi ulta bolta hai toh ignore karna seekho. Kabhi kabhi agar aap normal respect ke saath baat karoge, toh dimaag bhi thoda relax hoga.https://www.healthline.com/health/anxiety/anxiety-and-anger
Meri Office Ki Ek Kahani
Ek baar mere saath bhi aisa kuch hua. Office mein house renovation chal raha tha, toh main wahan gaya tha. Ek ladka caretaker tha, usse main normal baat kar raha tha. Par mujhe laga shayad main usse thoda rude ho raha hoon. Maine phir call kiya, “Ji, kaam theek chal raha hai?” Par uski awaaz se laga ki woh mujhse chidh raha hai.
Maine socha ki thoda pyaar se baat karunga taaki woh shant ho jaaye. Phir ghar aaya, paint ka kaam chal raha tha. Wahan do aadmi the, jinke baaton se mujhe laga ki woh mujhe taunt kar rahe hain. Mera mood turant kharab ho gaya. Dil karta tha ki kuch bol doon, par maine chup rehna behtar samjha.
Fir bhi, dimaag mein ye baat chalti rahi ki “Yeh log mere baare mein aise kyun baat karte hain? Inke itne aukaat kaise hain?” Main thoda emotional ho gaya tha, aur apne aap ko samjha raha tha ki itni chhoti baat par gussa kyun ho raha hai.https://khuljamind.com/anxiety-8/
Anxiety Ka Asar Aur Uska Samna
Aise situations mein hum apne dimaag ke saath ladte hain, khud se hi takraate hain. Kabhi kabhi choti baat bhi itni badi lagti hai ki hum khud hi apne dukh aur gusse mein phans jaate hain.
Mujhe aisa lagta hai ki anxiety aur mood swings ka treatment sirf dimaag ko samajhna hai, aur apne emotions ko control karna seekhna hai. Jab hum apne aap ko samjha lete hain ki kya galat hai aur kya sahi, tabhi hum apne aapko haara hua mehsoos nahi karte.https://my.clevelandclinic.org/health/symptoms/mood-swings
Mere Cousin Brother Ke Saath Baat-Chit
Maine apne cousin brother ko bhi apni anxiety ke baare mein bataya. Hum dono anxiety se guzar rahe hain, isliye jab bhi hum pareshaan hote hain, ek doosre se baat karte hain. Kyunki har kisi ko apni problems batana mushkil hota hai. Log mzaak bana dete hain ya samajhte hi nahi.
Mujhe apne emotions ko express karna zaruri lagta hai. Baatein share karne se thoda dimaag halka hota hai, aur solutions bhi milte hain.
Jab Doston Ke Calls Ne Dil Ko Dukhaya
Mere kuch doston ke calls aate the, lekin mera dil un calls ko uthana nahi chahta tha. Jab bhi koi call aata, mera mind active ho jata tha aur sochta tha, “Yeh mere baare mein kya bol rahe hain? Kya ye ulta bol rahe hain?” Jis se baat hoti thi, uske shabdon se mujhe darr lagta tha. Main sochta tha ki shayad woh mujhe kuch bura keh rahe hain.
Kabhi main unse puchta bhi tha, “Tum kya bol rahe the?” Par woh kuch nahi bolte the. Fir main khud hi sochta tha ki mera mazaak bana rahe hain. Is wajah se main calls avoid karne laga. Call uthana bhi mushkil lagta tha, kyunki lagta tha ki har koi meri burai kar raha hai.
Itna darr aur pareshani hone ke baad maine apna phone switch off rakhna shuru kar diya. Kabhi kabhi sochta tha ki main apne aas paas ke logon se door rahoon, kyunki mujhe laga ki sab mujhe judge kar rahe hain. Yeh sab mujhe andar se tod raha tha.
Apne Aap Ko Sambhalne Ka Safar
Phir maine socha ki main tab tak kuch nahi kar sakta jab tak main ulta na sochu ya apne doston se directly na baat karu. Maine apne mind ko thanda karna shuru kiya. Maine decide kiya ki main har baat par react nahi karunga, ignore karna seekhunga. Har kisi se ladna ya bahas karna zaroori nahi hai.
Maine apne negative thoughts ko positive thoughts mein badalne ki koshish ki. Dheere dheere meri halat thik hone lagi. Maine meditation aur mindfulness exercises shuru kiya, jo mere liye bahut madadgar sabit hua.
Ghar Se Bahar Nikalne Ka Darr
Mujhe ghar se bahar nikalte hue bhi darr lagta tha. Lagta tha ki sab mujhe peecha kar rahe hain, mere baare mein bura soch rahe hain. Bathroom ya apni chat par bhi jaane se darr lagta tha. Bachon ke pass jaane se, doston ke saamne jaane se darr lagta tha ki kahin mujhe pagal na samjha jaaye.
Kabhi kabhi main itna pareshan ho jata tha ki ro padta tha. Mere dil mein yeh khayal aata tha ki main apni zindagi khatam kar doon. Par mujhe apni life pyaari thi, isliye main apne aap ko sambhalne ki koshish karta raha.
Madad Lena Aur Apni Zindagi Sudharna
Maine socha ki mujhe professional madad leni chahiye. Maine doctor se baat ki aur apni problems batai. Unhone meri baat dhyan se suni aur 10 din ki dawai di. Maine dawai lena shuru kiya, aur uske sath meditation, mindfulness aur cognitive behavioral therapy (CBT) bhi apnaya.
Maine apne aap ko social media se door rakha, motivate videos dekhe, apni daily routine mein sudhar kiya, jaise ki time par sona aur uthna, screens band karna.
Aaj Ki Halat Aur Seekh
Aaj main bilkul theek hoon. Mujhe apne aap par pura bharosa hai. Main apni anxiety aur mood swings ko control kar pa raha hoon. Mujhe apni zindagi ke liye umeed hai aur main khul ke apni baat sabke saath share karta hoon.
Mera blog likhne ka maksad yehi hai ki jo log mere jaise mental health issues se guzar rahe hain, unhe madad mil sake. Positive soch apnaye, apne negative thoughts ko challenge karein, aur kabhi himmat na haarein.
Conclusion
Kabhi bhi kisi baat par turant react na karein. Pehle baat ko samjhein, confirm karein ki kya sach mein aapke khilaf kuch kaha gaya hai. Agar aisa na lage, toh us baat ko ignore karein. Har kisi se ladna ya bahas karna zaroori nahi. Apne aap ko positive environment mein rakhein, positive logon ke saath waqt bitayein.
Agar aapko anxiety ya overthinking ho rahi hai, toh apne aap ko ek room mein lock karna, ya apne fears ka samna karna seekhein. Negative thoughts ko positive thoughts se replace karna seekhein. CBT forms bhar kar apne thought patterns ko badalne ki koshish karein.
Agar ye blog aapko madad kare, toh please like, share aur comment karein. @khuljamindhttps://khuljamind.com/ecg/