Bachpan ke dar se anxiety ka beej padta hai
Anxiety shuru hoti hai hamare bachpan se, jab hamare parents humein har choti choti cheez mein darate hain. Jaise koi guest aa rahe hain, toh pehle hi bol dete hain:
“Jaise vo aayega uske pair chhune hain, uske aage badtameezi nahi karni.”
Unka intention hota hai ki bade logon ki izzat karo. But humare mann mein us insaan ke liye darr paida ho jaata hai. Fir hum usse life-time ke liye darne lagte hain.
Hamare ghar mein yeh cheez normal thi — “Yeh ameer hai, iski izzat karo”, “Yeh doctor hai”, “Yeh teacher hai”, “Iske jaise banna hai”. Matlab, tumhe agar life mein kuch banna hai toh bas inhi jaise bano, warna kuch nahi.
Hamare ghar ke log faltu mein uss bande se humein darwa dete the. Fir hum usse baat karne se darte, nazar churane lagte. Reality mein usse kuch pata bhi nahi hota, bas usse fekne ki aadat hoti hai. Par hamare ghar wale usi ko sach maan lete, kyunki uske paas thode paise aa jaate hain.
Chahe vo paisa mehnat se aaya ho ya kismat se, rabb jaane. Mera toh yeh manna hai — agar dil nahi kar raha kisi ke aage jhukne ka toh jhukna mat. Hamari life, hamare decisions.https://nimhans.ac.in/child-mental-health/
Rishtedaron ke pressure se confidence tootna
Koi rishtedaar tumhe dekh kar khush nahi hai. Vo hamesha tum mein kamiya dhoondhenge. Hum bachpan se darte aaye hain —
“Dekho uncle aaye hain, pair chhuno.”
“Koi rishtedaar aaye, pair chhuno.”
Agar hamare andar se aayi hai respect dene ki feeling, toh do. Nahi aayi, toh mat do. Jabardasti ke darr aur respect bachpan mein anxiety ke pehle kadam hote hain.
Financial inferiority ka guilt aur confidence todna
Tumne dekha hoga, jab bachpan mein family ke saath ghoomne jaate hain, maan lo mama-massi ke saath. Toh mummy bolti thi:
“Maine paise nahi diye, tumhare mama ne hi diye hain. Hum toh free mein ja rahe hain, kuch bhi khane ke liye zid mat karna.”
Toh hum sochne lagte hain — humne paise nahi diye, toh hum kuch nahi maang sakte. Bhookh lag rahi ho tab bhi nahi bol sakte. Agar kuch mangwa liya, toh lagta hai — kahin yeh na bol de ki “iske wajah se paise zyada lag gaye.”
Aise mein confidence bohot low ho jaata hai. 5 din ka tour hota hai, par hum sochte hain — “Kab khatam hoga?”
Jo zyada paise lagata hai, sab uske aage “ji ji” karte hain. Hotel jaana ho, toh bola jaata hai: “Tu chal, tu dekh kya khana hai?”
Sab aloo ka paratha kha rahe hain, par ek bolega “paneer chahiye” — toh uske liye alag se paneer aa jaata hai.
Tum bologe toh sab tedhi nazar se dekhne lagte hain.
Yeh sab cheezein tumhe demotivate karti hain. Tumhare mann mein darr baith jaata hai — jo zindagi bhar sath rehta hai.
Mera kehna yeh hai — agar tumhari jeb mein paise hain, toh hi jao ghoomne. Nahi hain, toh please mat jao. Especially mama-chacha ke saath, kyunki unke saath tumhara confidence toot jaayega. Jo kabhi wapas nahi banega.
Public space mein self-doubt aur social anxiety ka janam
Jo confidence low hua hota hai family pressure se, vo aage chal kar social anxiety ban jaata hai.
Bachpan mein bola gaya — “Iske pair chhoo, isse respect se baat karna, iski baat hi sach hai” — ye sab dimaag mein baith jaata hai.
Aur jab family tour pe jaate hain bina paise ke, toh rishtedaar ganda behave karte hain. Tumhare khane ki plate utha lete hain. Badtameezi karte hain.
Agar tum 50 rupees ki cheez kha rahe ho, toh taunt maarte hain —
“Tune kab khayi yeh cheez?”,
“Mera baccha toh yeh nahi khata”,
“Yeh company ke nahi hai kya?”
Is sab se tumhara confidence aur toot jaata hai. Jab tum bade hote ho, toh kisi se baat karne ka bhi mann nahi karta. Akela jaane se darr lagta hai. Apne upar doubt hone lagta hai —
“Main theek se chal raha hoon?”,
“Koi mere baare mein ulta toh nahi bol raha?”
Tumhare dimaag mein 100 baatein chalti hain.
Example ke liye — maan lo tum kahin baithe ho, 5–7 dost aas paas hain. Tum unse baat karte ho, toh anxiety nahi hoti. Kyunki roz milte ho.
Par jaise hi koi unknown banda aa gaya, tum uncomfortable ho jaate ho. Sochne lagte ho — “Yeh kab jaayega?”, “Yeh mere baare mein kya soch raha hoga?”
Agar tum group mein ho aur 7–8 ladke khade hain, dheere-dheere sab jaane lagte hain. Tum sabse end mein jaate ho, kyunki darr hota hai — agar pehle chala gaya toh kahin mera mazaak na udaayein.
Agar tum himmat karke pehle chale jaate ho, toh bhi sochne lagte ho — “Peeche mere hi baare mein baat ho rahi hogi”, “Mera hi mazaak udaya jaa raha hoga.”
Ghar jaa kar overthinking shuru ho jaati hai.
Ek baat dusri overthinking laati hai, aur aakhir mein anxiety ka janam hota hai.https://khuljamind.com/mere-anxiety-ki-kahaani/
Jab overthinking physical symptoms mein badalne lagti hai
Jab anxiety trigger hone lagti hai, toh overthinking se physical symptoms hone lagte hain:
- Heartbeat fast ho jaati hai
- Saans tez chalti hai
- Sweating hone lagti hai
- Neend nahi aati
Maan lo tumhein heart-attack wali anxiety hai. Tum kuch bhi heart-attack related sunte ho, toh tumhari anxiety trigger ho jaati hai.
Chahe tum gym karte ho, fit ho, healthy diet follow karte ho — phir bhi jab kisi bodybuilder ki death sunte ho, tum sochne lagte ho — “Agar uske saath ho sakta hai, toh mere saath bhi.”
Jaise mere saath hua — jab maine pehli baar anxiety attack feel kiya.
Ek dum se news aayi — Satnam Khattra mar gaye. Jo gym karta hai usne uska naam suna hi hoga. India ke sabse bade biceps the. Test karwaane ke baad, acchi diet ke baad bhi uski death ho gayi. Tab laga — humare saath bhi kuch ho sakta hai.https://www.tribuneindia.com/news/punjab/celebrity-fitness-coach-satnam-khatra-dies-at-31-133370
Tab mujhe fever tha, workout nahi ho raha tha. Dost ne bola pre-workout pee le. Maine pee li. Ghar jaake anxiety start ho gayi — neend nahi aayi. Subah saans lene mein dikkat hone lagi. Lag raha tha — heart attack aa raha hai.
Bhai ko bola, usne kaha — terrace pe walk kar. Pahle thik laga, phir aankhon ke saamne andhera chhane laga. Tez daud kar 3rd floor se ground pe aa gaya. Mummy ko bola — “Hospital le chalo, mujhe heart attack aa raha hai.”
Hospital gaye. Doctor ne BP aur ECG kiya — sab normal tha. Bola — “Tumhe anxiety attack aaya hai.”
Tab maine pehli baar suna — “Anxiety.” Ghar aake padha — yeh mental health bimari hai.
Fir sochne laga — “Kahi main pagal toh nahi ho gaya?”
“Mujhe kabhi theek hoga ya nahi?”
Wahi log dimaag mein aaye jo pehle normal the, phir mentally ill ho gaye.
5 Main Root Causes of Anxiety in Daily Lifehttps://www.psychologytoday.com/us/blog/in-practice/201909/the-root-causes-anxiety
1. Overthinking
Anxiety usually starts with overthinking. Jab hum kisi baat ko baar-baar sochte hain, toh woh baat hamare dimaag mein baith jaati hai. Isse hamare dimaag mein negative patterns banne lagte hain, jo anxiety ko janam dete hain.
Ek example lete hain — maan lijiye aap apni gali se ja rahe ho aur 4-5 ladke samne baithe hain. Aap unke saamne se guzar jaate ho, aur woh hansne lagte hain. Tab aap sochne lagte ho ki shayad woh aapke upar hans rahe the, ya aapki kisi baat ka mazak uda rahe the. Fir dimaag mein 100 alag-alag khayal aane lagte hain, jaise ki “Yeh meri besti kar rahe the,” ya “Yeh meri kapdon ka mazak bana rahe the.”
Aapke dimaag mein negative thoughts aane lagte hain, gussa badhne lagta hai, aur aap sochte ho, “Kabhi toh unko main bhi maarunga,” ya “Agar phir se milenge, toh main unhe pakad lunga.”
Yeh sab sirf aapke dimaag ke banaye hue negative patterns hain. Agar aap apne dimaag ko positive thoughts dete, jaise ki “Ho sakta hai woh bas hasi-mazaak kar rahe the, mujhe kuch nahi kaha,” toh aapka dimaag shaant hota aur aap ache feel karte. Isi wajah se overthinking anxiety ka ek main root cause hai.https://khuljamind.com/overthinking-kya-hai-meri-kahani-jo-har-overthinker-ko-padni-chahiye/
2. Fear of Death
Bahut logon ko anxiety ke time fear of death ya maut ka darr hota hai. Jab heart rate badhta hai, ya paseena aata hai, toh hum sochte hain ki shayad heart attack aa gaya.
Ek example: Mai aur mere dost office ke paas ek dhaba gaye the, jahan garam khaddi chawal milte the. Maine khaddi chawal khaya, toh paseena aane laga aur mera heart rate bahut tez ho gaya. Maine socha ke heart attack aa gaya. Dost ne mujhe hospital le jaane ko kaha, main itna ghabra gaya ki roone laga. Hospital mein mera heart rate 150 ke aas-paas tha. Doctor ko batane par pata chala ki ye anxiety attack tha.
Is dar aur ghabrahat ke karan log sochte hain ki shayad wo mar jaayenge. Yeh fear of death bhi anxiety ka bada root cause hai.
3. Stress
Aajkal har kisi ke life mein stress hota hai — chahe kaam ka stress ho, financial stress ho, ya target achieve karne ka pressure.
Jaise koi banda 30 lakh ka monthly target rakhta hai, ya EMI bharne ka tension.
Kuch log apni salary se apni EMI bhi nahi bhar paate, jiski wajah se recovery agents ke calls aate hain, jo aur zyada stress badhate hain.
Isi wajah se log apni problems kisi se share nahi karte, andar hi andar stress badhta rehta hai. Stress se anxiety kaafi badh jati hai, aur kabhi-kabhi log apni life se hi haar maan lete hain.
4. Sab Mere Baare Mein Kya Sochte Hain
Anxiety aur overthinking ke patients ko ye lagta hai ki sab unke baare mein galat sochte hain.
Maan lijiye office mein aapke senior aapko halki muskaan dete hain, toh aap sochte ho ki shayad woh aapka mazak uda rahe hain.
Aap har baat ko itna overanalyze karte ho ki dimaag mein negative thoughts hi negative thoughts chalne lagte hain.
Kabhi kabhi toh ye soch kar aap itne udaas ho jaate ho ki lagta hai sab aapki burai kar rahe hain.
Par asal mein aisa kuch nahi hota. Yeh bas aapke anxiety ke vichaar hote hain, jo aapko tod dete hain.
5. Social Media Fake Lifestyle
Aajkal social media par har koi apni life ko perfect aur luxurious dikhata hai.
Log dikhate hain ki woh crore kamate hain, expensive cars chalate hain, lekin asal mein yeh sab fake hota hai.
Ye log apne courses bechte hain, paid ads chalate hain, aur logo ko bewakoof banate hain.
Is fake lifestyle ko dekh kar hum demotivate ho jaate hain, aur apni life se comparisons karte hain.
Yeh comparison aur jealousy bhi anxiety badhane mein madad karti hai.
Isliye social media ka use limited karo, aur sirf wahi dekho jo aapko seekhne aur grow karne mein madad kare.
Conclusion
Anxiety ke root causes samajhna bahut zaroori hai. Humme apne aap ko jhukna nahi hai, chahe kitni bhi problems aayein.
Apne aap ko apna bhagwan banao, kyunki jo tum kar sakte ho, woh duniya mein koi nahi kar sakta.
Jaise Mahatma Gandhi ne socha tha, “Main hi apne desh ko azaadi dila sakta hoon,” aur APJ Abdul Kalam ne socha tha, “Main scientist ban kar apne desh ko aage badhaunga.”
Aap bhi apne aap se pyaar karo, apne khayal rakho, aur anxiety ko apni life se hatao. Thode se changes laakar aap apni life ko better bana sakte ho, aur main yakin karta hoon ke aap ye kar sakte ho.
Agar aapko ye blog acha laga, toh please like, share, aur comment karein.
— @Khuljamindhttps://khuljamind.com/anxiety-hone-ke-5-psychological-reasons-jo-log-ignore-kar-dete-hain/