Jo log heart anxiety se guzar rahe hain, unhe pata hoga ECG ki kitni importance hoti hai unki life mein. Jab bhi dil ki dhadkan tez ho jaati hai, ya heart beat fast lagti hai, toh ghbrahat hone lagti hai. Lagta hai ki abhi heart attack aa jayega. Phir sabse pehle hospital bhaagna hota hai, aur doctor sabse pehle ECG karwate hain. Doctor ECG isliye karwate hain taaki check kar sakein ki koi heart ki asli problem toh nahi.
Anxiety ke patients jab hospital jaate hain, toh woh itne zyada ghabraye hote hain ki bas bolte rehte hain, “Mujhe bahut ghabrahat ho rahi hai, mujhe abhi heart attack aane wala hai.” Doctor unke veham ko door karne ke liye sabse pehle ECG karwate hain, aur agar ECG normal aata hai toh blood pressure (BP) bhi check karte hain, taaki confirm ho jaye ki heart related koi problem nahi hai.
Anxiety Ka Saamna – Meri Kahani
Ek baar main ghar par tha, achanak mujhe itni zyada ghabrahat hui ki main bina kapde pehne bhaag kar hospital jaane laga. Dil ki dhadkan itni tez ho rahi thi ki mere haath-pair kaap rahe the, aur kapde pehna bhi mushkil ho raha tha. Maine apni wife ko bike par bithaya aur hospital le jaane laga. Bike chalate-chalate mera heart beat itna fast ho gaya ki mujhe laga abhi heart attack aa jayega. Maine apni wife se kaha, “Mujhe bachao, mujhe bachao.” Woh mujhe sambhalti rahi aur doctor ke paas le gayi.
Doctor ne poocha, “Kahan dard ho raha hai?” Maine chest ke alag-alag jagah touch karke dard bataya. Doctor ne turant samajh liya ki yeh heart attack nahi, anxiety hai. Usne kaha, “Koi baat nahi, relax karo.” Phir ECG karwaya, jo bilkul normal aaya. BP bhi normal tha. Doctor ne kaha, “Aapko anxiety hai, iske liye medicine doonga.”
Medicine lene ke baad mujhe thoda aaram mila.https://khuljamind.com/anxiety-8/
Anxiety Aur Overthinking
Ek din main apne doston ke saath tha. Hum zyada tar ghar se bahar nikalte hain, enjoy karte hain, lekin main sochta tha ki shayad unki zindagi itni easy hai ki unhe koi tension nahi. Ek dost ne kaha, “Mumbai se wapas aane ke baad main bahut zyada ghutan mehsoos karne laga hoon. Kabhi kabhi toh lagta hai ki main apni zindagi khatam kar doon.”
Usne bataya ki ghar par rehna aur overthinking karna uske liye bahut mushkil ho gaya hai. Ghar wale aksar faltu baatein karte hain, jiski wajah se uska dil fast dhadakne lagta hai aur wo ghabrane lagta hai. Maine usse kaha, “Yeh toh mera bhi haal hai. Dimag kuch bhi pakad leta hai, aur main puri din us baat ko sochta rehta hoon.”https://www.psychologytoday.com/us/blog/think-act-be/201701/why-overthinking-can-lead-anxiety
Anxiety Aur Panic Attacks
Kabhi kabhi mujhe lagta tha ki mujhe heart attack aane wala hai. Koi bhi news ya article agar heart attack se related hota toh main bahut zyada ghabra jaata tha. Saans lene mein takleef hoti, body mein dard hota, aur mujhe lagta tha ki ab main marr jaunga.
Maine doctor se check-up karwaya, aur unhone bataya ki ye sab anxiety ke symptoms hain. Anxiety se banda nahi marta, bas ye mental health ka issue hota hai. Maine internet par padhai ki, videos dekhi, blog padha aur samjha ki anxiety ek mental condition hai jisme negative thoughts aur childhood trauma ki wajah se dimag mein aise patterns ban jaate hain, jinke chalte overthinking hoti hai aur phir anxiety badh jaati hai.
Proper doctor se consult karna aur medicine lena zaroori hota hai. Saath mein physical aur mental exercises bhi karni chahiye, jisse anxiety thik ho sakti hai.https://adaa.org/understanding-anxiety/panic-disorder-agoraphobia
Jab Maine Hospital Ko Seer Par Utha Liya
Ek subah 5 baje mujhe panic attack aaya. Pasina bahut aa raha tha, dil tez dhadak raha tha, aur main samajh nahi pa raha tha ki kya ho raha hai. Main bhaag kar mama ke ghar gaya aur unhone turant mujhe hospital le gaye. Doctor ne ECG likh kar diya, lekin ECG wale 30 minute tak nahi aaye, jo mujhe aur ghabrahat mein daal gaya.
BP check karne par sab normal tha, phir bhi mera dil nahi manta tha. Phir ECG karwaye, normal aaya, lekin mere haath-pair kabhi kabhi kaap rahe the. Doctor ne kaha, “Relax karo, thodi der mein theek ho jaoge.”
Maine kai baar ECG karwaya kyunki mujhe lagta tha ki mera heart thik nahi hai. Par har baar ECG normal aata tha. Phir bhi jab gym mein workout kar raha tha, achanak phir se heart fast dhadakne laga aur mujhe laga abhi heart attack aa jayega.
Mere doston ne mujhe samjhaya ki main thoda aaram karoon, lekin mera dimaag yeh sab nahi maanta tha.
conclusion
Mujhe pata chala ki anxiety se darrna, usse ghabrana normal hai. Lekin is darr ko samajhna aur doctor se madad lena zaroori hai. ECG ek test hai jo check karta hai ki heart mein koi asli problem hai ya nahi, aur anxiety mein ye test normal aata hai.
Agar aapko bhi heart attack ka darr hai aur baar-baar ECG karwane ki zarurat mehsoos hoti hai, toh aap akela nahi ho. Anxiety ek mental health ka issue hai, jiska ilaj mumkin hai. Doctor ki salah se medicine lein, apne thoughts ko control karne ki koshish karein, aur exercise ko apni routine ka hissa banayein.
Anxiety se mat dartiye, samjhiye. Yeh marne wali baat nahi, balki samajhne wali baat hai.https://khuljamind.com/heart/
2hffqo
uvnkn6
w618qh